25/Yanvar/2023 Ilm-fan
TOSHKENT, 25-yanvar. /“Dunyo” AA/. O‘zbekiston Kosmik tadqiqotlar va texnologiyalar agentligi tomonidan joriy yil 25-27 aprel kunlari Toshkent shahrida «Space Technology Conference, STC-2023» xalqaro konferensiyasi o‘tkaziladi, deb xabar bermoqda “Dunyo” AA muxbiri.
O‘zbekistonda kosmik texnologiyalarning ijtimoiy-iqtisodiy sohalarga taʼsiriga bag‘ishlangan mazkur konferensiya Buyuk Britaniyaning “Dialogue Events” kompaniyasi ko‘magida tashkil etilmoqda.
Konferensiya doirasida shoʻba muhokamalar, taqdimotlar, Yoshlar forumi, ikki va ko‘p tomonlama “G2G”, “G2B” va “B2B” shakllaridagi muzokaralar bo‘lib o‘tishi rejalashtirilgan.
Anjumanda Markaziy Yevroosiyo davlatlari kosmik agentliklari va tegishli idoralari, xalqaro fazo tashkilotlari, kosmos sohadagi xususiy jabha vakillari hamda O‘zbekistonning tegishli vazirlik va idoralari vakillari ishtirok etishi ko‘zda tutilgan.
Konferensiyani o‘tkazishdan ko‘zlangan maqsad kosmik texnologiyalarni Markaziy Yevroosiyo mamlakatlarida ijtimoiy-iqtisodiy rivojlanishning barqaror omili sifatida muhokama qilish uchun mintaqaning kosmik agentliklari va xalqaro kosmik hamjamiyatni birlashtirgan holda zamonaviy kosmik texnologiyalarning iqtisodiyotdagi turli sohalarga tadbiq etilishi orqali sohalar samaradorligini oshirish imkoniyatlarini yoritish, sohadagi xalqaro hamkorlikni yana-da rivojlantirishdan iborat.
