13/Aprel/2020 COVID-19
TOSHKENT, 13-aprel. /“Dunyo” AA/. Qashqadaryoda ham koronavirusga chalingan ikki nafar bemor sog‘aydi, deb xabar bermoqda “Dunyo” AA muxbiri Sog‘liqni saqlash vazirligi manbasiga asoslanib.
Viloyat yuqumli kasalliklar shifoxonasidan 2 nafar koronavirus infeksiyasiga chalingan bemorga javob berildi. Bemorlarning laboratoriya tekshiruvlari ularning darddan butunlay forig‘ bo‘lganini ko‘rsatdi. Endi ular reabilitatsiya markazida shifokorlar kuzatuvida bo‘ladi.
Sog‘ayganlardan biri 8 yoshli, ikkinchisi esa 56 yoshli fuqaro bo‘lib, har ikkisi ham Chiroqchi tumanidan.
Eslatib o‘tamiz, kecha, yakshanba kuni ham bir qator yurtdoshlarimiz, xususan, Virusologiya ilmiy-tekshirish instituti klinikasidan 19 nafar, Buxoro viloyati yuqumli kasalliklar shifoxonasidan 4 nafar va Xorazm viloyatida yuqumli kasalliklar shifoxonasidan yana bir nafar hamyurtimiz koronavirus infeksiyasidan davolanib, reabilitatsiyaga kuzatilgan edi.
Shunday qilib mamlakatimiz bo‘ylab, jami 68 nafar bemor koronavirus infeksiyasidan to‘liq sog‘aydi.
