30/May/2023 Hamkorlik
RIM, 30-may. /“Dunyo” AA/. Joriy yil 22-26-may kunlari O‘zbekistonning Rimdagi elchixonasi va BMT Taraqqiyot dasturining Toshkentdagi vakolatxonasi ko‘magida mamlakatimizning Qishloq xo‘jaligi vazirligi va uning tizimidagi qator ilmiy-tadqiqot institutlari mutasaddi rahbarlaridan iborat delegatsiya Italiyada bo‘ldi, deb xabar bermoqda “Dunyo” AA muxbiri.
Tashrifdan ko‘zlangan maqsad Yevropa Ittifoqi loyihasi doirasida O‘zbekiston oziq-ovqat va qishloq xo‘jaligi sohasida “yashil” iqtisodiyotga o‘tish, shuningdek, qishloq xo‘jaligida bilim va innovatsiyalar sohasida ilg‘or xorijiy tajribani o‘rganish bilan izohlanadi.
Tashrif davomida O‘zbekiston vakillari Italiya qishloq xo‘jaligi, oziq-ovqat xavfsizligi va o‘rmonchilik vazirligi, Qishloq xo‘jaligida ilmiy tadqiqotlar va iqtisodiy tahlil kengashi, Agrar siyosat va bioiqtisodiyot tadqiqot markazi hamda Uzumchilik va enologiya tadqiqot markazi mutasaddi rahbarlari bilan samarali uchrashuv va muloqotlar o‘tkazdi.
Italiyalik mutaxassislar mamlakat qishloq xo‘jaligi, shu jumladan, meva-sabzavotchilik, uzumchilik, chorvachilik va baliqchilik tarmoqlari hamda irrigatsiya tizimlarining bugungi holati va istiqbollariga oid taqdimotlar o‘tkazdi.
Shuningdek, delegatsiya vakillari Italiyadagi bilim va innovatsiyalarning amaldagi integratsiyasini o‘rganish maqsadida mamlakatning Emilya-Romanya va Veneto hududlarida joylashgan qator ko‘rgazma maydonlarida ham bo‘lishdi.
O‘zbekiston qishloq xo‘jaligi vazirligi bilan o‘rnatilgan hamkorlikni yana-da kengaytirish va qo‘shma ilmiy-amaliy loyihalarni amalga oshirish masalalari xususida fikr almashildi.
Shuningdek, O‘zbekiston qishloq xo‘jaligi va uning salohiyati to‘g‘risida taqdimotlar o‘tkazildi. So‘nggi olti yil davomida agrar sohada o‘tkazilayotgan tub islohotlar, shuningdek, qishloq xo‘jaligini rivojlantirishning 2030 yilga mo‘ljallangan strategiyasining izchil ro‘yobga chiqarilayotgani Italiya mutaxassislarida qiziqish uyg‘otdi.
Shu bilan birga, tomonlar O‘zbekiston qishloq xo‘jaligida bilim va innovatsiyalar tizimini qo‘llab-quvvatlash borasida hamda ilmiy-tadqiqot institutlari o‘rtasida yaqindan hamkorlik qilishga kelishib oldi.
O‘zbekiston va Italiya o‘rtasida kelgusida agrar sohada zamonaviy bilim va innovatsiyalar borasidagi yaqin hamkorlik mamlakatimizning barqaror rivojlanishiga o‘zining munosib hissasini qo‘shishga xizmat qiladi.
