02/Fevral/2023 Tarix
TOSHKENT, 2-fevral. /“Dunyo” AA/. Bugun Stalingrad qamalidagi g‘alabaga 80 yil to‘ldi, deb xabar bermoqda “Dunyo” AA muxbiri.
Ikkinchi jahon urushi davridagi eng yirik janglardan biri — Stalingrad mudofaasi uchun kechgan janglarda qahramonlik ko‘rsatgan minglab askarlar orasida Namangan viloyati To‘raqo‘rg‘on tumani Bardamko‘l qishlog‘ida tug‘ilgan vatandoshimiz Kamoljon Turg‘unov ham bor edi.
Yaqinda “Stalingrad” klubi aʼzolari va Volgograd viloyati Ayollar palatasi tomonidan Kamoljon Turg‘unov avlodlariga yo‘llangan maktubda Volga bo‘yidagi shaharning himoyachilari orasida hamyurtimiz ko‘rsatgan qahramonlikning ahamiyati kattaligi taʼkidlangan. “1942 yilning kuzida u va uning safdoshlari 58 kun davomida Stalingraddagi mashhur Pavlov uyini mardona himoya qilgan. Uning safdoshlarining aytishicha, serjant Kamoljon Turg‘unov nafaqat kuchli askar, balki mehribon va g‘amxo‘r inson bo‘lgan. O‘sha qiyin davrlarda u oxirgi burda nonini Pavlov uyining yerto‘lasida yashiringan bolalar bilan birga baham ko‘rgan. Kamoljon Turg‘unov barcha bolalarning hayotini saqlab qolishga va ularni Volga daryosining boshqa sohiliga evakuatsiya qilishga katta yordam ko‘rsatgan», deb bitilgan maktubda.
Bugun Pavlov uyida “Stalingrad” klubi faoliyat yuritmoqda. Klub Pavlov uyi muzeyini tashkil qilgan. Bu yerda Ikkinchi jahon urushi qahramonlari xotirasiga bag‘ishlangan ko‘plab hujjatlar saqlanmoqda. Qahramon jangchilar haqida kitob nashrga tayyorlanyapti.
“O‘zbek xalqining Ikkinchi jahon urushidagi xizmatlari, bag‘rikengligi va mehmondo‘stligi ko‘plab kitoblar va filmlarda muhrlangan. Urush yillarida respublika bir yarim milliondan ko‘p kishini o‘z bag‘riga oldi. Biz qahramonlarimizni hech qachon yoddan chiqarmaymiz va ular ko‘rsatgan jasorat haqida yosh avlodga so‘zlab berishda davom etamiz. Biz serquyosh O‘zbekiston aholisiga tinchlik tilaymiz», deb taʼkidlangan maktuda.
