28/Yanvar/2023 Iqtisodiy diplomatiya
MADRID, 28-yanvar. /“Dunyo” AA/. O‘zbekiston elchixonasi xodimlarining Ispaniya Savdo-sanoat palatasi xalqaro departamenti boshlig‘i Xayme Montalvo bilan uchrashuvi bo‘lib o‘tdi, deb xabar bermoqda “Dunyo” AA muxbiri.
Suhbat chog‘ida O‘zbekiston va Ispaniya o‘rtasida savdo-iqtisodiy sohadagi hamkorlik masalalari, shu jumladan, joriy yil mart oyida o‘tkazilishi rejalashtirilayotgan qo‘shma biznes-forumda palata rahbariyati va aʼzolarining ishtirokini taʼminlash masalalari muhokama qilindi.
Mazkur tadbirda Ispaniyaning o‘ttizga yaqin yetakchi kompaniya vakillari ishtirok etishi ko‘zda tutilayotgani maʼlum qilindi. Tadbirda qator ikki tomonlama investitsiya loyihalari va eksport shartnomalari imzolanishi kutilmoqda. Jumladan, temir yo‘l, qishloq xo‘jaligi, suvtejamkor sug‘orish texnologiyalari, shamol energetikasi, to‘qimachilik, charm sanoati, qurilish materiallarini ishlab chiqarish va boshqa yo‘nalishlarda hamkorlikda qo‘shma loyihalar bo‘yicha muzokaralar o‘tkazilishi rejalashtirilgan.
Bo‘lajak biznes-forumda O‘zbekiston Savdo-sanoat palatasi boshchiligida tadbirkorlarning ishtirok etishga katta qiziqishi mavjudligi va puxta tayyorgarlik ishlari olib borilayotgani maʼlum qilindi.
Muzokaralar yakunida tomonlar mazkur biznes-forumni yuqori saviyada tashkil etish va o‘tkazish borasida kelishuvga erishdi.
