25/Март/2023 Долзарб
БРЮССЕЛЬ, 25 март. /«Дунё» АА/. Гент университети (Бельгия) магистранти Искандарбек Баҳодирбеков «Дунё» АА учун интервьюсида Ўзбекистон делегацияси аъзоси Саида Мирзиёеванинг Нью-Йоркда бўлиб ўтган БМТнинг Сув масалалари бўйича конференциясининг ялпи сессиясидаги нутқи ҳақидаги фикрларини билдирди.
- 2023 йил 20-22 март кунлари Нью-Йоркда БМТнинг Сув масалалари бўйича конференцияси бўлиб ўтди. Конференция сув ресурсларини бошқариш ва барқарорлик билан боғлиқ муаммолар ва имкониятларни муҳокама қилиш учун бутун дунёдан экспертлар, сиёсатчилар ва манфаатдор томонларни бирлаштирди. Мазкур анжуманда Ўзбекистон делегацияси таркибида Саида Мирзиёева иштирок этди.
Конференция Марказий Осиёдаги сув инқирозини енгиш борасидаги глобал саъй-ҳаракатларнинг муҳим босқичи бўлди, бу эса дунёнинг кўплаб мамлакатларини ташвишга солмоқда. Саида Мирзиёева минтақа вакили сифатида Орол муаммосини ҳал этишда халқаро ҳамкорлик зарурлигини таъкидлади. Чунки Орол денгизи ҳалокати барча манфаатдор томонларнинг келишилган жавобини талаб қиладиган мураккаб муаммодир. Конференцияда Президент Шавкат Мирзиёев томонидан илгари сурилган ташаббуслар ҳам самарали эканлиги эътироф этилди, шу боис улар халқаро миқёсда кенг қўллаб-қувватланди ва 2021 йилда БМТнинг Оролбўйи минтақасини экологик инновациялар ва технологиялар ҳудуди деб эълон қилиш ҳақидаги резолюцияси қабул қилинди. Шунингдек, 2018 йилда БМТнинг Оролбўйи минтақаси учун Инсон хавфсизлиги бўйича кўп томонлама шериклик траст жамғармаси ташкил этилди.
Сўзининг якунида Саида Мирзиёева халқаро ҳамжамиятни глобал сув масалалари билан чамбарчас боғлиқ бўлган Орол фожиаси оқибатларини юмшатишда Ўзбекистоннинг саъй-ҳаракатларини қўллаб-қувватлашни давом эттиришга чақирди. Шунингдек, Орол денгизи ҳавзаси бир қанча давлатлар учун умумий эканлиги ва сув ресурсларини самарали бошқариш улар ўртасида ҳамкорликни талаб қилиши таъкидланди.
Хулоса ўрнида айтиш керакки, БМТнинг 2023 йилги Сув масалалари бўйича конференцияси Орол муаммосининг долзарблигини эътироф этиб, сувдан барқарор фойдаланиш амалиёти, зарар кўрган жамиятларни ижтимоий ва иқтисодий қўллаб-қувватлаш, халқаро ҳамкорлик, атроф-муҳитни тиклаш ва самарали бошқарув зарурлигини таъкидлади. Конференциянинг хулосалари сиёсатчилар, манфаатдор томонлар ва ҳукуматлар учун муаммони ҳал қилиш ва Орол денгизи ҳавзасининг янада барқарор келажагини тарғиб қилиш учун «йўл харитаси»ни тақдим этади.
