06/Июнь/2023 Спорт
ТОШКЕНТ, 6 июнь. /«Дунё» АА/. Жори йилнинг 3-4 июнь кунлари Сербия пойтахтида велоспортнинг шоссе йўналиши бўйича «Belgrade Grand Prix woman tour» халқаро мусобақаси бўлиб ўтди, деб хабар бермоқда «Дунё» АА мухбири.
Миллий Олимпия қўмитаси маълумотига кўра, икки босқичдан иборат «2.2 - Stages - Class 2» таснифидан ўрин олган мазкур турнирда Ўзбекистон аёллар терма жамоаси ҳам иштирок этди.
Мусобақанинг иккинчи кун пойгаси ҳамюртларимиз учун омадли ўтди. Унда «Tashkent City Women Professional Cycling Team» клуби аъзоси Нафосат Козиева иккинчи ўринни қўлга киритди. Аҳамиятлиси, 80 км. масофага кечган пойгада 4 нафар спортчи финишда бир хил натижа (2 соат, 5 дақиқа, 49 сония) кўрсатди. Бир неча сантиметрлар ғолиб номини аниқлаб берган дастурда кучли тўртлик қуйидагича кўриниш олди:
1. Моника Брзезна (Польша)
2. Нафосат Козиева (Ўзбекистон)
3. Алина Богдан (Украина)
4. Шаҳноза Абдуллаева (Ўзбекистон)
Мусобақа якунида 3 нафар ҳамюртимиз София Каримова (6), Янина Кускова (8), Маргарита Мисюрина (10) кучли ўнликдан жой олиб, Париж-2024 Олимпиадаси йўлланмаси учун рейтинг очколарини жамғаришди. Регламентга мувофиқ, ҳар икки босқичда кучли бешликдан жой олган атлетлар ҳам ўз ҳисобларини қимматли очколар билан бойитиб олишди. Яна бир аҳамиятли томони, София Каримова 23 ёшгача бўлган спортчилар орасида умумий ҳисобда учинчи натижани қайд этди.
