15/Май/2022 Ўзбекистон дунё нигоҳида
ТОШКЕНТ, 15 май. /«Дунё» АА/. Қозоғистоннинг «Инфозакон» онлайн–нашрида «Янги Ўзбекистон — ижтимоий давлат» сарлавҳали мақола эълон қилинди, деб хабар бермоқда «Дунё» АА мухбири.
Мақолада Ўзбекистонда ижтимоий ҳимоя тизимининг асосий ва энг кучли томони - инсоннинг бутун ҳаётини қамраб олувчи кенг қамровли дастурлар амалга оширилаётгани қайд этилган. Таъкидланганидек, мамлакатда аҳолининг эҳтиёжманд қатламлари ижтимоий ҳимоясини кучайтириш бўйича аниқ чора-тадбирлар механизми қабул қилинди.
«Ўзбекистонда 3 миллиондан ортиқ киши ёки аҳолининг қарийб 9 фоизини катта ёшдагилар ташкил этади. Кексаларни моддий қўллаб-қувватлаш, уларга кундалик ғамхўрлик ва эътибор кўрсатиш учун маҳалла даражасидаги янги тизим яратилди», - деб ёзади нашр.
Нашр Ўзбекистонда 376 та, жумладан, 324 та болалар ва 52 та катталар учун мўлжалланган давлат ижтимоий муассасаси фаолият кўрсатаётгани маълум қилган.
Материалда эндиликда оилавий меҳрибонлик уйлари тарбияланувчилари учун озиқ-овқат, кийим-кечак, гигиена воситалари ва бошқа асосий воситаларни харид қилиш учун давлат бюджетидан маблағлар соддалаштирилган тартибда ажратилаётган таъкидланган. Шу билан бирга, коммунал харажатларни (электр, сув, газ) тўлаш учун имтиёзлартақдим этилмоқда.
«Бундан ташқари, 2022-2023 йилларга мўлжалланган мақсадли дастур доирасида барча 600та давлат ижтимоий муассасаларини қуриш-таъмирлаш ва жиҳозлаш ишлари учун 376 миллиард сўм ажратилди», деб ёзади «Инфозакон».
