06/Сентябрь/2022 Ўзбекистон Мустақиллигининг 31 йиллиги
РИМ, 6 сентябрь. /«Дунё» АА/. БМТ Қишлоқ хўжалигини ривожлантириш халқаро жамғармасининг (ИФАД) Ўзбекистон бўйича масъул директори Фиди Ражонсон давлатимиз мустақиллигининг 31 йиллиги муносабати билан ўзбекистонликларга байрам табригини йўллади, деб хабар бермоқда «Дунё» АА мухбири.
– Қишлоқ хўжалигини ривожлантириш халқаро жамғармаси номидан Ўзбекистон халқини мустақилликнинг 31 йиллиги муносабати билан самимий табриклайман ва энг эзгу тилакларимни билдираман.
2011 йил Ўзбекистон Қишлоқ хўжалигини ривожлантириш халқаро жамғармасига қўшилганидан буён муҳим ҳамкоримизга айланди.
Ушбу халқаро жамғарма Ўзбекистоннинг қишлоқ хўжалигини диверсификация қилиш йўлидаги тарихий қадамларига ҳисса қўшиб келмоқда.
Қишлоқ хўжалигини ривожлантириш халқаро жамғармаси Ўзбекистонда амалга оширилаётган таркибий ислоҳотлар қаторида инклюзив ва барқарор озиқ-овқат тизимини ривожлантиришдаги мақсадларини қўллаб-қувватлашда давом этишини билдираман.
Мазкур халқаро жамғарма Ўзбекистонда қишлоқ жойларда фаровонликни ошириш, кичик ишлаб чиқарувчиларнинг турмуш даражасини юксалтириш ва қишлоқ аҳолиси, аёллар ва ёшларнинг имкониятларини кенгайтиришга қатъий интилади.
Мустақиллик байрамингиз муборак бўлсин!
