28/Январь/2023   Иқтисодий дипломатия

Испания Савдо-саноат палатаси билан иқтиқболдаги тадбирлар кун тартиби муҳокама қилинди

МАДРИД, 28 январь. /«Дунё» АА/. Ўзбекистон элчихонаси ходимларининг Испания Савдо-саноат палатаси халқаро департаменти бошлиғи Хайме Монтальво билан учрашуви бўлиб ўтди, деб хабар бермоқда «Дунё» АА мухбири.

Суҳбат чоғида Ўзбекистон ва Испания ўртасида  савдо-иқтисодий соҳадаги ҳамкорлик масалалари, шу жумладан, жорий йил март ойида ўтказилиши режалаштирилаётган қўшма бизнес-форумда палата раҳбарияти ва аъзоларининг иштирокини таъминлаш масалалари муҳокама қилинди.

Мазкур тадбирда Испаниянинг ўттизга яқин етакчи компания вакиллари иштирок этиши кўзда тутилаётгани маълум қилинди. Тадбирда қатор икки томонлама инвестиция лойиҳалари ва экспорт шартномалари имзоланиши кутилмоқда. Жумладан, темир йўл, қишлоқ хўжалиги, сувтежамкор суғориш технологиялари, шамол энергетикаси, тўқимачилик, чарм саноати, қурилиш материалларини ишлаб чиқариш ва бошқа йўналишларда ҳамкорликда қўшма лойиҳалар бўйича музокаралар ўтказилиши режалаштирилган.  

Бўлажак бизнес-форумда Ўзбекистон Савдо-саноат палатаси бошчилигида тадбиркорларнинг иштирок этишга катта қизиқиши мавжудлиги ва пухта тайёргарлик ишлари олиб борилаётгани маълум қилинди.   

Музокаралар якунида томонлар мазкур бизнес-форумни юқори савияда ташкил этиш ва ўтказиш борасида келишувга эришди.