Uz / Ўз Ru En

Toshkent

29/Июнь/2020   Иқтисодиёт

Европа Иттифоқига маҳсулот етказиб берувчи экспортёрлар «REХ» тизимида рўйхатдан ўтиши тавсия қилинмоқда


ТОШКЕНТ, 29 июнь. /«Дунё» АА/. Ўзбекистон Республикаси Инвестициялар  ва ташқи савдо вазирлиги Европа Иттифоқи мамлакатларига маҳсулот етказиб берувчи экспортёрларни «REХ» тизимида олдиндан рўйхатдан ўтишга чақирди, деб хабар бермоқда “Дунё” АА мухбири.

«REХ» – Европа Иттифоқида Преференциялар бош тизимида қўлланиладиган тартибга мувофиқ, маҳсулотлар келиб чиқишининг имтиёзга эга эканини тасдиқлаш мақсадида экспортчиларни рўйхатдан ўтказиш тизимидир.

Мамлакатимизда ушбу тизимни қўллашни назарда тутувчи тегишли ҳужжат – Вазирлар Маҳкамасининг «Товарларнинг келиб чиқишини сертификатлашни ўтказиш тартиби тўғрисидаги низомни тасдиқлаш ҳақида»ги қарори 2019 йил 13 декабрь куни қабул қилинган.

Тизимда рўйхатдан ўтказиш экспортчилар томонидан тадбиркорлик фаолияти ҳақидаги маълумотларнинг ўрнатилган тартибда, ариза шаклида киритилиши орқали амалга оширилади. Кейинчалик эса рўйхатдан ўтган экспортёрлар Европа Иттифоқи мамлакатларига маҳсулотларни экспорт қилишда ўз маҳсулотларининг имтиёзли эканини инвойсда (ЕИ мамлакатлари божхона органларига А шаклидаги сертификатни тақдим этмаган ҳолда) баённома/декларация орқали тасдиқлайди.

Қайд этиш жоиз, «REХ» тизими доирасида маҳсулотнинг келиб чиқиш мамлакатини тасдиқлаш тартиби ва шартлари ҳақидаги маълумот Инвестициялар ва ташқи савдо вазирлигининг сайтида жойлаштирилган эди.  https://mift.uz/ru/menu/vneshnetorgovoe-regulirovanie.

Ушбу «REХ» тизимида рўйхатдан ўтказиш экспорт расмиятчиликларини соддалаштиради ва экспортёрларга маҳсулотларининг келиб чиқиши тўғрисидаги ҳужжатларни ўзлари тузишига имкон беради.

Бунинг учун экспортчи ваколатли органга тўғри тўлдирилган шакл (ариза)ни тақдим этиб, бир марта мурожаат қилади ҳамда «REХ» тизимида рўйхатдан ўтади. Келгусида экспортчи ўз маҳсулотининг ҳар бир янги жўнатмасини Европа Иттифоқи мамлакатларига экспорт қилишда ваколатли орган билан такрор боғланишга зарурат қолмайди.

Вазирлик манбасида келтирилишича, «RЕХ»да экспортчиларни рўйхатдан ўтказишга асосланган «ўзини-ўзи сертификатлаш» тизимига ўтиш даври 2020 йилнинг 30 июнида ўз ниҳоясига етади. Шундан сўнг имтиёзли тартиб фақат рўйхатдан ўтган экспортчилар маҳсулотининг кузатув ҳужжатига (инвойс) илова қилинган – келиб чиқиши ариза билан тасдиқланган товарларга қўлланилади. Бу эса Европа Иттифоқи давлатларининг божхона органлари томонидан имтиёзлар учун сертификатлар қабул қилинмаслигини англатади.

Айни пайтда мамлакатимизда экспортчилар «Ўзбекэкспертиза» акциядорлик жамияти ва унинг ҳудудий корхоналарида жорий йил бошидан буён белгиланган тартибда рўйхатдан ўтказилмоқда.

Мавзуга оид

Россия Федерацияси билан инвестиция ва с...

Ўзбекистон Республикаси Инвестициялар ва ташқи савдо вазирлигида Россия Федерацияси Саноат...

2023 йил ЕТТБ Бошқарув кенгашининг йилли...

Лондонда бўлиб ўтган Европа тикланиш ва тараққиёт банки директорлари кенгашининг махсус йи...

«Шимолий Муборак» конида газ қазиб олина...

Қашқадарё вилояти Муборак туманида жойлашган,1968 йилда ишга туширилган «Шимолий Муборак» ...

Сўнгги янгиликлар