25/Декабрь/2021   Иқтисодиёт

Буюк Британиядан муносабат: «Uzbekistan GTL» заводи Ўзбекистоннинг янги саноат марказига айланади

ЛОНДОН, 24 декабрь. /«Дунё» АА/. Буюк Британиянинг энегетика соҳасидаги «Energy Intelligence» нашриёти гуруҳига кирувчи «Nefte Compass» нашри бош муҳаррири Майкл Ричи Қашқадарё вилоятида қад ростлаган суюлтирилган синтетик ёқилғи ишлаб чиқариш бўйича заводнинг очилиши муносабати билан фикр-мулоҳазаларини билдирди, деб хабар бермоқда «Дунё» АА мухбири.

- Ўзбекистонни суюлтирилган синтетик ёқилғи ишлаб чиқаришга ихтисослашган «Uzbekistan GTL» заводи очилгани билан самимий табриклайман. Бу бутун дунёдан турли компаниялар ва пудратчилар иштирок этган энг замонавий корхона бунёд этиш бўйича амалга оширилган улкан ишларнинг ажойиб натижаси бўлди.

Шунингдек, янги завод Ўзбекистоннинг табиий газ экспортини кескин камайтириш борасидаги саъй-ҳаракатларининг бир қисмидир.   Энди газ хом-ашёси нефть-кимё ва кимё саноатида юқори қийматли маҳсулотлар ишлаб чиқариш учун ишлатилади. «Uzbekistan GTL» заводи Ўзбекистоннинг янги саноат марказига айланади.