08/Июль/2022 Ҳамкорлик
НЬЮ-ЙОРК, 8 июль. /«Дунё» АА/. АҚШда амалий ташриф билан бўлиб турган давлатимиз раҳбарининг махсус вакили Абдулазиз Комилов бошчилигидаги делегация БМТ Бош котиби ўринбосари, Терроризмга қарши кураш бошқармаси раҳбари Владимир Воронков билан учрашув ўтказди, деб хабар бермоқда «Дунё» АА мухбири.
Владимир Воронков мамлакатимизда амалга оширилаётган конституциявий ислоҳотларнинг мазмун-моҳияти, аҳамияти ва устувор йўналишлари билан таништирилди.
Жорий йил 25-26 июль кунлари Тошкентда ўтказилиши режалаштирилган Афғонистон бўйича халқаро анжуманга тайёргарликнинг бориши хусусида атрофлича фикр алмашилди.
Бош котиб ўринбосари БМТ Ўзбекистоннинг ушбу муҳим форумни чақириш ташаббусини қатъий қўллаб-қувватлашини ва уни муваффақиятли ўтказиш учун зарур ёрдам кўрсатишга тайёрлигини таъкидлади.
Сўнгги беш йил давомида сифат жиҳатидан янги босқичга кўтарилган Ўзбекистон ва БМТ ўртасидаги ҳамкорликни кенгайтириш ва чуқурлаштириш масалалари ҳам кўриб чиқилди.
