04/Декабрь/2022   Ҳамкорлик

«Better Cotton Initiative» компанияси Ўзбекистонда ўз ваколатхонасини очишни режалаштирмоқда

СТОКГОЛЬМ, 4 декабрь. /“Дунё” АА/. Ўзбекистоннинг Швециядаги Муваққат ишлар вакили Нодир Ғаниев «Better Cotton Initiative»  халқаро нотижорат ташкилотининг операцион директори Лена Стаафгард билан учрашди, деб хабар бермоқда “Дунё” АА мухбири.

Музокаралар чоғида «Better Cotton Initiative» ташкилотининг Ўзбекистон билан ҳамкорликни ривожлантириш, шунингдек, мамлакатимиз пахта-тўқимачилик кластерларига пахта етиштиришни жаҳон андозалари даражасида ташкил этишга кўмаклашиш бўйича режалари муҳокама қилинди.

Томонлар икки давлат ўртасидаги савдо-иқтисодий ҳамкорликнинг бугунги ҳолати, шунингдек, Ўзбекистон тўқимачилик маҳсулотларининг Швецияга экспортини ошириш истиқболлари юзасидан фикр алмашди.

Лена Стаафгард «Better Cotton Initiative» ташкилоти ўзбекистонлик ҳамкорлар билан алоқаларни мустаҳкамлаш мақсадида Тошкентда ўз ваколатхонасини очишни режалаштираётганини маълум қилди.