01/Апрель/2022 Долзарб
ЖИДДА, 1 апрель. /«Дунё» АА/. Биринчи Тошкент Халқаро инвестиция форумида иштирокчиси, Араб-Африка иқтисодий олий кенгаши раиси Ҳани бин Ҳасан Абузайд «Дунё» АА мухбирига берган интервьюсида ушбу анжумандан олган таассуротлари билан ўртоқлашди.
- Азим Тошкентда ўтказилган йирик анжуманда бевосита иштирок этганимдан беҳад мамнунман, - деди Ҳани бин Ҳасан Абузайд. - Форум юксак даражада ташкил этилди. Меҳмонларни аэропортдан кутиб олишдан то меҳмонхонага жойлаштириш, форумда қатнашиш, маданий дастур ва аэропортда кузатиб қўйишгача бўлган барча масалалар мукаммал ташкил этилгани бизни ҳайратга солди.
Яна бир гап. Ўзбек халқининг меҳмондўстлиги, пойтахтингиз кўчалари ва овқатланиш жойларининг озодалиги жуда ҳавасимизни келтирди.
Мен бундан аввал ҳам Ўзбекистонда бўлганман. Аммо сўнгги беш йил ичида республикада турли соҳаларда кенг кўламли ислоҳотлар амалга оширилгани ва улкан ўзгаришлар рўй берганини дарҳол пайқадим.
Форумда Ўзбекистон Президенти Шавкат Мирзиёевнинг иштироки тадбирнинг мавқеи нақадар баланд эканидан далолат берди. Давлатингиз раҳбари форумдаги нутқида мамлакатнинг савдо-иқтисодий ва инвестициявий имкониятлари юзасидан ўз фикр ва мулоҳазаларини очиқ-ойдин ўртоқлашди. Хорижий инвестор ва тадбиркорларни биргаликда ишлашга даъват этди. Мухтасар қилиб айтганда, Ўзбекистонда амалга оширилаётган турли инвестиция лойиҳаларининг шаффофлиги ва бу йўналишда бюрократик тўсиқларнинг бартараф этилаётганлиги хорижий инвесторларнинг республикада бизнес қилиш истагини янада оширмоқда.
